متكلبش بفعل فاضح في الطريق العام

“متكلبش بفعل فاضح في الطريق العام” ده بيكون حال عربيتك لو ركنتها لمؤاخذة في مكان مش تمام. صف تانى مثلا او ثالث او مكان مافيهوش وقوف اساسا.

وهذا يذكرني بفكرة كلبشة العربيات. وانا بعتبرها من اغرب الافكار اللي شوفتها في حياتي. بتحسسني اننا بنتعامل مع العربيات كانهم بشر.

لقد ارتكبت هذه السيارة جريمة وينبغي على رجال المرور البواسل الحفاظ على طرقنا من هذا الجرم الفاحش. لقد زادت جرائم هذة السيارة عن الحد وينبغي علينا القبض عليها. ولكن يجب ان نقبض عليها متلبسة بجرمها كي لا تلف وتدور وتفر من قبضة القاضي وقت محاكمتها على ما فعلت.

وعشان كده المرور بيبقي مجهز الونش وكلبشاته ومستعد للقبض على اي سيارة مخالفة في اى وقت. برافووووووو!!

نحاول بقي سوى نوصل لفكرة اختراع هذه الكلبشات

في البداية عندنا مشكلة وقوف عربية في مكان مخالف. والمكان المخالف للوقوف هو المكان اللي المفروض يبقي فاضي دايما لسبب ما. امام مسشتفي مثلا او امام مبني المحافظة. او ممكن مكان هيعطل حركة المرور. فلما تيجي عربية فاسقة تقف في هذا المكان. يجب التعامل معها بكل صرامة كي تكون عبرة لكل السيارات الاخري. ولا فرق في هذا بين عربة واخرى. لافرق بين مرسيدس ولا شاهين بي ام ولا لادا لامبورجيني ولا كارو بحمار. كله هيتكلبش.

بس فيه سؤال. لما عربية تعمل العملة دي اليس من المفترض ان نزيحها من المكان ده لانها كده معطلة حركة المرور او عاملة مشكلة للمبني اللي سيادتها واقفه قدامه. يبقي المفروض اننا نحركها من المكان ده بسرعة. لكن الكلبشة هتوقفها في مكانها. وبالتالي هتفضل العطلة موجودة !!! وده عكس المطلوب انجازه !!

استنتج من هذا سيدي القاضي ان الشاهد مشافش حاجة. قصدي الكلبشات محلتش المشكلة. هي اه حطت عالعربية وعلى صاحبها لكن ماحلتش المشكلة.

طب ايه الحل ياعم الفيلسوف الناصح. نعمل ايه في الناس اللي بتركن في الاماكن دى.

القضية اللي امامنا في غاية السهولة واليسر يا سيادة القاضي. نستخدم المخالفات الورقية او التيكيتس لرصد المخالفة ونعطي صاحب السيارة الفرصة لتحريك عربته مرسيدس كانت او شاهينا في اقرب فرصة. وهذا لان فرصة تحريك العربة من هذا المكان لن تاتي الا بيد صاحبها وعليه فان الكلبشات ستعطل صاحب السيارة عن تحريك عربته بالاضافة الي تعطيل الحركة المروريه.

لا عندك حق في دى يارغاي.

حكمت المحكمة حضوريا بوقف استعمال كلبشات السيارات بي ام كانت او لادا وكل الانواع واستعمال المخالفات الورقية وسيجري البحث عن طريقة التعامل مع العربة الكاررو لاننا مشعارفين هنحط التيكيت فين. ونشكركم على حسن استماعكم والله الموفق والمستعان

Leave a Reply