حافظ مش فاهم

حافظ مش فاهم دى بقت كلمة بنقولها كتير ويكأنها 🙂 من أكبر الفواحش. ايه يعنى اما واحد يكون حافظ حاجة ومشفاهمها وايه الفرق بينه وبين اللى فاهم ومش حافظ؟

سواءا كان حافظ مش فاهم او فاهم مش حافظ فالاتنين ميعرفوش يأدوا المهمة. الحفظ لا يقل اهمية عن الفهم فى شيء.

هل ينفع افهم جدول الضرب مثلا؟ اه ينفع لكن حفظه بيختصر الكتير والكتير من الوقت.

والذكاء مهم بردو عشان تقدر تعمل عمليات حسابية اسرع. يعنى مثلا لو قولتلك 150 على 12 بكم؟ ممكن تحس انك محتاج حسبة او قعدة عشان تفكر. في حين انك لو حافظ ان 12 في 12 بـ 144 ولاحظت ان الفرق بين الـ150 والـ144 هو 6 وقتها ممكن في ثوانى تقول ان 150 على 12 تساوي 12.5

المقصود ان الحفظ والفهم الاتنين مهمين. لانك لو مش حافظ ان 12 في 12 بـ 144 هتتعب ولو مشفاهم ومشغل دماغك هيبقي حفظك مش فعال. لذلك الحفظ والفهم مهمين.

الحفيظ مش كخة لان الحفظ ده مهارة ممتازة ومفيدة جدا زيها زي القدرة على الاستيعاب.

حفظ الاسعار وعمليات الضرب والقسمة افادني كتيييير جدا فى شغلى.

يعنى مثلا انا عارف سعر حاجات كتييييير فى شغلى وبالتالي مش محتاج وقت عشان ادور على السعر وحافظ بردو اسعار الاربع او خمس وحدات من نفس السلعة بكام.

مثلا انا حافظ ان 79 في 2 بـ 158 وحافظ ان 35.25 علي 5 بـ 7.05 وحافظ ان 7.05 في 4 بـ28.2 وحافظ كمان ان 33.75 في 3 بـ 101.25 وارقام واسعار كتييييير وده بيوفر عليا وقت كتييييييير وحسسنى بقيمة الحفظ.

وده مش قدرة خارقة اي حد شغال بيحفظ الحاجات دى. انا قصدي نبطل تريقة على الحفيظة والحفظ لانه مهارة مهمة ومطلوبة وغالبا تريقتنا عليهم ما هى الا غيرة او ممكن حقد.

 

وفيه انواع كتير من الحفظ منهم نوع مفييييد جدا وهو الذاكرة الفوتوجرافية ودول الناس اللى بيقدروا يحفظوا اى صورة بكل تفاصيلها من نظرة واحدة لدرجة انهم ممكن يحفظوا صفحة من كتاب بمجرد نظرة ليها. ودى حاجة كان نفسي تكون عندى بصراحة.

باختصار الانجاز محتاج الحفظ والفهم وعمره ماهيحصل بحاجة واحدة منهم. زى مابنقول ايد واحدة ماتصقفش.

 

فرسالة لكل الفهيمة والحفيظة بطلوا تنفسنوا على بعض. الفهيم بينفسن عشان الحفيظ غالبا بيرتب عالدفعة. والحفيظ بينفسن عالفهيم عشان بيبان دايما اذكي. لكن عشان تكون عالم كبير ورجل ذا شأن لازم مالاتنين. ياريت نتعلم من بعض.

 

لو حابب تتعلم الحفظ فيه كتاب جميل جدا لكاتب معروف اسمه هارى لورين “Harry Lorayne”والكتاب اسمه الدليل الكامل للتحكم فى الذاكرة”The Comlete Guide To Memory Mastery”.

مؤلف الكتاب ده كان بيقدر يحفظ مجلات ويخلى ناس تسأله ويسمعلهم ويقولهم كل صفحة فيها ايه وشارح ازاى كان بيعمل كده. وفيه جزء تاني فى الكتاب لتحسين قدرات العقل زى سرعة البديهة والتدقيق.

وأحب اكتب اول كلمان الكاتب في كتابه” يذكر ان الكاتب الامريكي مارك توين قال الجميع يتحدثون عن الطقس ولكن لا يفعلون شيئا بشأنه” ثم يقول هارى “بالمثل فان الناس يتفاخرون بذاكرتهم الضعيفة ولكن القليل جدا هم الذين يفعلون شيئا بشأنها

الكتاب ده كان من اروع ما قرأت وفعلا يستاهل وزنه ذهب

سلام واشوفكم في موضوع تانى وماتنساش تشير لو عجبك الموضوع

Leave a Reply